1 Corinthians 2
1Mu fetinan, layaan ne savat simi xena kuusanaana maana tuunayan sina Piran ne pife faavupuul nami pana texaasan lava, piau. 2Senaso ne fo lamon faati o layaan ne waan xuvul pami ne taa lamon fa'uli mon a saxa mo: na Yesus Krais e a maatan sina xuluna bolo. 3Layaan ne savat simi ne pife savat pana gutan lava, piau, ne taxa radakui pana matautan. 4A lagasai e a kuusan siak re piau ta texaasan lava o gutan sina mataa taasaxa, a Vovau e gutan sina Piran re savat la matavas 5talo a fufuna namkaian simi xo i taa pife waan lana texaasan sina mataa taasaxa lana gutan sina Piran.A Texaasan Sina Piran A Savat Malaan
6Taasaxa, xe siri aava ri matalava lana namkaian, a lagasai simaam a toxan a texaasan. A pife texaasan sina rabuna ti tanin o sina maana paamua ti tanin senaso a gutan siri taxa malit xo. 7Piau, taara taxa ferawai pana texaasan aava Piran fo fune xasena rabuna. Lokavai mupiis, paamuina yaan a Piran a vesan fasavat a maana mo nane a lamon faati o a texaasan aanabe' i taa fabas netaara pana miridingan. 8Pi ta paamua ti la xavala aava masam sena texaasan aanabe'. Tamo ri tafo texaas sena ri taa pife niil fataxutan a Memai ina Miridingan xuluna bolo. 9Taasaxa, lana Xakalayan Taap a kuus:“Pi ta mataa a xalume o langaie, e pi ta mataa a lamon fati a mo aava Piran fo faigotane pari aava ri vubuxan xasingite.” a
10Taasaxa Piran fo faxalit famatavase xe sitaara sena Vovau ina.
A vovau aave a xalum xolan a maana mo xapiak e maana fufuna faisok sina Piran sait. 11E sena mataa, a vovau sina mon a texaas sena maana mo aava ri waan la xunus ina. E malaanabe' a Vovau sina Piran fatak mon a texaas sena maana mo aava ri waan la xunus ina. 12Taara pi siak a vovau ti la xavala, piau, taara fo siak a vovau aava Piran a lisane talo taara taa masam sena maana mo aava Piran fo tavai xatam netaara pana. 13E taara ferawai pana maana mo aave, taara pife ferawai lapaana texaasan sina rabuna ti la xavala, piau. A Vovau sina Piran a fapiti netaara pana tuunayan sina Piran e voxo taara fexaxaas sena ferawai lapaana fepitaian sina. 14A mataa aava pi ta Vovau aave i taa pife turoxo pana maana mo aava ri savat sena Vovau sina Piran. Nane pife masam seri e a lamon o ri mo palau mon. Nane pife fexaxaas sena taraxali a maana mo sina Vovau sina Piran tamo nane piau ta vovau aave. 15A mataa pana vovau aave a fexaxaas sena tiis a malangiis ina maana mo xapiak, taasaxa nane xa i taa pife waan lapaana tiisan sina mataa. 16Senaso lana Xakalayan Taap a kuus:
“Nase' texaas sena lamonan sina Memai? Nase' fexaxaas sena fapitie?” b
Taasaxa netaara xo, taara toxan a lamonan si Krais.
Copyright information for
LEU